النهاردة أجُبرت أروح أكتوبر وكنت عايز أروح مطعم في مكان تاني أجربه وأصحابي كانوا قاعدين في أركان في كافيه «دي روما» شوفت الأكل معجبنيش شكله خالص في الكافيه أنا غالباً مش بحب أكل الكافيهات عشان مش بيهتموا بالشيفات يكونوا محترفين قولت لا منا مش هاجي أكتوبر على الفاضي.

أنا هقوم آكل أنا في مكان تاني حلو دورت حواليا لقيت «كاراكاس » مطعم لبناني حلو بحب فرعه اللي في ميدان لبنان مجربتش اللي هنا بس اغراني المطعم المصري و كان معايا صاحبتي أجنبيه و المطاعم اللبناني عندهم كتير بس مفيش مصري كتير و البلدي يوكل زي ما بيقولوا :))) دخلت المطعم الديكور حلو اوي والناس لابسين لبس ريفي و هوا مطعم ريفي و المنيو كبير جدا قولت ربنا يستر. انا مبيعجبنيش أي مطعم بيعمل أكل مصري أغلبهم مش حلوين و بيفتوا. الأكل إتأخر شوية بس جيه شوفت شكله يجوع جداااا.. باينلها بشارة حلوة. خدت حته عيش سخن مولع مخبوز عندهم و كان قابب و نام العيش فيه لبابه كدا تشيل الملوخيه مش عيش ورق و طعمه كان يجنن وفيه ردة من تحت كتير.

ومسكر جداً سكر النشويات ده. و الملوخيه مفيش أفشخ من كدا قوام وطشه وطعم قوي جداً يسطل بجد من أحلى الملوخيات اللي كلتها قريب بجد..

الرز المعمر كان حكاية ورواية و قصص قصيرة متصلة منفصلة :)))

شوربة و قشطة و لبن و رز شاربهم و حاجه فشيخه كدا و محشي قطع صدور فراخ الفلاحين بيحطوا الفراخ بعضمها بس هنا حاطينه صدور تحفهههههه تحفههه البتنجان كان فوق الوصف برضه تاني بتنجان يعجبني بعد بتنجان سمية «فسحة سمية» السلطة حلوة أوي و الخضار فريش.

الحلو كان فطير فشييخ بالسكر مش فطير سيس زي محلات الفطير ده فطير بجد راقات وسمنه وسكر ونهيت الملحمه دي بقرع عسل طاجن جريتان حاجه فشيخه كدا بشاميل وقرع عسل دايب زي المهلبيه مش بيتمضغ دايب متفرقوش عن البشاميل غيرىاللون البرتقالي الداكن الفشيخخخخ و باين فيه اليافه دي زي المانجه.

انا اتبسطت أوي أوي أوي بالأكل النهاردة حقيقي أكل المطعم ده فشيخ و صاحبتي اتبسطت جداً شرفونا قدام الاجانب.

الأسعار طبعا عالية بس يستاهل

رز معمر لحمه ?? رز معمر فراخ ?? فطيرة سكر سادة ?? قرع عسل ?? ملوخيه فراخ ??

بلدينا ، أركان مول ، الشيخ زايد