بالهنا والشفا: مطعم تبولة.. عندما تشتاق إلى الأكل اللبناني
اشتقت للمطبخ اللبناني وقررت النهاردة آكل أكل بعشقه واللي فيه تنوع مش موجود في مطبخ تاني من المطابخ العالمية وكمان فيه أكلات جديدة ومبتكرة.
الحقيقة المطاعم اللبنانية الكويسة قليلة جداً في مصر، اللبنانية اللي بجد مش الضحك على الدقون وبما إني خبير في الأكل اللبناني مبيعجبنيش العجب، بس الحقيقة النهاردة اتبسط في المطعم ده.
أولاً لأني لقيت الأكلة اللي بحبها جداً ومفيش مطاعم كتير بيعملوها وهي الكبة النية وفتّة البتنجان؛ حقيقي اشتقتلهم أوي وفرحت لما لقيتهم موجودين هنا.
دخلت المحل، ديكور شرقي مع لمسات لبناني على الحيطان وأغاني باللهجة اللبنانية شغالة، نقيت مكان مناسب وقعدت.
استقبلني المدير ورحب بيا وقعدت أختار معاه آكل إيه ورشحلي فتة البتنجان مفكرتش وطلبتها مع كبة نية ومقبلات تبولة وحمص متمتم وورق عنب بالزيت وخرشوف بالليمون وشيشة عنب.
الشيشة طلبتها تنزل الأول عقبال ما الأكل ينزل، كانت تحفة أنا بعشق العنب، قعدت اتسليت فيها شوية عقبال ما الأكل نزل.
الأكل نزل شكله يجنن طريقة التقديم متقنة، الورق العنب ابتديت بيه عشان بحبه أوي ومش أي حد يعمل ورق عنب بالزيت حلو وكان تحفة طري وخفيف وبيتاكل بسرعة.
التبولة تجنن بمزازته الليمون اللي فيها والبرغل والخضرة وقطع الطماطم السيكسي الساقعة تفرفشك كدا وتفتح نفسك على الأكل.
أخدت حتة عيش ودوقت الخرشوف، الحقيقة أنا بعشقه، ناس كتير مش بتحبه بس عاملينه بطريقة تجنن حقيقي عجبني أوي ودوقت الحمص اللي بالفول على الطريقة اللبنانية مطحون كويس أوي وتتبيلته عظيمة.
الكبة النية نزلت وقولت بس، من هنا هعرف المطعم ده حلو ولا لأ.
الكبة بينزل معاها تومية خطيرة اتبسط بيها أوي، التوم مش لازع فيها وكريمي حطيت منها شوية على الكبة، هي عبارة عن لحمة نية مدقوقة مع برغل وتوابل وزيت وملح وكزبرة ومدقوقين مع بعض جامد جداً متحسش أبداً معاه بزفارة ولا إنها نية.
بتبقا عاملة زي العجينة كدا طعمها خطير مع البصل والتومية كنت منسجم جداً معاها مع أغنية طلع فيا بتاعت ماجدة الرومي، كنت بحرك راسي مع الحتة المقسوم اللي بتقول فيها ( لا بدي تراضيني ولا بدي تحاكينييي انساني انساني اعمل معروف ) وفي بقي الكبة وبهز راسي كنت منشكح اني باكل حاجة مكلتهاش بقالي سنين وكانت وحشاني وطلعت حلوة.
الطبق الرئيسي نزل وقررت ميكونش لحوم مش كل يوم لحوم الواحد يتعب، كان فتة بتنجان مع العيش والزبادي والصنوبر، الحقيقة أنا من عشاق البتنجان أصلاً، بالذات المقلي.
كان مربعات من البتنجان الطري السخن الملهلب مع صوص زبادي ساقع وتحتيه عيش ( مفيش رز الفته اللبناني مفيهاش رز ) والصنوبر الجميل المقرمش.
الزبادي طعمه مش قوي طعمه خفيف ورقيق مع صوص اللي بيتحط والزيت الزيتون طعم فوق الوصف سيبت كل اللي حواليا وركزت معاه لحد ما خلصته.
ورجعت تاني للمقبلات باكلهم مع بعض بالتساوي على قد ما قدرت وبعدها شبعت رجعت تاني للشيشة الحقيقة كان نفسي أجرب الشاي عندهم بيتقدم في براد وكوبيات صغيرة بس أنا مش من هواة الشاي وكمان مكنش في سانتي في بطني فاضي ليه، اكتفيت بالمياه والشيشة.
الأسعار
ورق عنب ?? خرشوف ?? حمص متمتم ?? فتة بتنجان ?? كبه نيه ?? شيشة ??
تبولة، الزمالك، شارع طه حسين
القسم : طبخ
اضف تعليق