بالهنا والشفا: Diet house مطعم لعشاق الرجيم
المره دي المطعم مختلف تماماً من حيث المضمون أنا في العادي مش بحب اكل الدايت عشان مفيهوش متعة.
الحقيقه عندي كذا سبب اني عملت كدا.
اولهم ان بطني في حاله مزرية من طبعا اللي بعملوا فيها والتجارب اليومية السيئة والكويسة ثانيا قولت تجديد وثالثا عشان اخد هدنه كدا واريح بطني شويه ناكل اكل صحي ونرجع تاني للأكل الفشيخ.
المهم سيبكم من الصعبانيات دي، المطعم ده عجبني جداً أنا لو بعمل دايت هبقي راشق عنده في الأيام اللي بنكون مشتاقين جداً لحاجة مختلفة غير الجبنة القريش اللي بتسود الحياة والتفاح اللي كرهناه والزبادي والتوست البني والشوفان واللي بيجوع أصلاً مش بيشبع والعيش السن المقرمش اللي بيحسسنس إني بتسلي مش باكل وكمان تسلية مملة من غير طعم ولا الأكل الناشف اللي من غير صوصات ولا الأكل اللي شكله وحش ولا ليه ريحه ولا طعم.
المطعم ده انقذ الناس اللي بتعاني ديه لما يحبوا يدلعوا نفسهم يروحوله يشبعوا حتي عنيهم يشتغلوها انها هتاكل اكل حلو حتي.. الاكل عامة كان حلو وقريب للطبيعي دخلت طبعا سببت ازعاج للناس قعدت ارغي واعرف قصه المحل واعرف بيقدموا ايه صوتي عالي وبتجول في كل المكان وبسأل كتير وبتناقش هاكل ايه مع كل الاستاف مش مع واحد بس بحب لما ادخل مكان اعيش كدا مش اقعد ساكت وابقى زبون هادي
المهم رشحولي البيتزا و قالوا انها اكتر حاجه بيطلبها الناس عندهم
اخترت بيتزا بيف و اخترت main course طبق فراخ ومعاه بطاطس و طلبت سلطه سيزر بالفراخ صاحب المطعم دكتور دايت مشهور و طبعا سألت ازاي دول هيبقوا دايت ومكنتش مصدقهم قاللي جرب تاكل عندنا اسبوع واوزن نفسك قبلها وبعدها لو مخسيتش وزيدت في الوزن يبقي احنا عندنا مشكله وساعتها اعمل اللي انت عايزه
كلام جميل
البطاطس قالي هي مش مقليه في الفرن بتستوي بعد السلق والفراخ بتتشوي والسلطه فراخ جريل بس كان شكلها مسلوق شويه والصوصات خفيفه جدا ومتشال منها الحجات اللي بتخن الاكل كله مفيهوش زيت ولا سمنه ولا حجات صناعيه او فيها دهون ولا ملح
المهم نزل الاكل طبعا كنت متحمس للبيتزا حجمها مش كبير بس دا كويس عشان الناس اللي بتعمل دايت كان طعمها حلو مقارنه بانها مفيهاش الحجات الاساسية اللي بتعمل الطعم يعني انا لو عامل دايت وهفاني على بيتزا وهموت خلاص لو رحت كلتها هتبسط وشكلها كمان حلو جدا معموله بعجينه غامقه دايت والكالوريز فيها قليلة جدا مقارنة بالطبيعية.
السلطة كانت حلوة اوي وساقعه طبيعيه كدا والفراخ مكنتش احسن حاجه بس شغالة بالنسبه للدايت مقبولة جدا بس زودوا اكسترا صوص عشان الصوص طعمه ضعيف محتاج ملح بس انا قررت اني مزودش ملح عشان اخوض التجربه زي ما هي.
الفراخ والطبق الرئيسي طبعا عشان انا متعود علة الاحجام لما نزل اتخضيت قولت اكيد لا حجمه صغير قطعه فراخ ??? جرام مشويه طعمها كان حلو الحقيقة بس طبعا ناقصة ملح اللي عايز يزود بس انا مزودتش البطاطس شكلها محمره بس هي مش محمره وكانت لطيفه جدا حبيت صوص باربكيو كمان كان طعمه قريب جداً ليه بيفي بالغرض جداً
التجربه عجبتني جدا وهككررها تاني كمان في ركن خاص بالاطفال عشان لو معاكوا اولادكم يقدروا يلعبوا
الاسعار غالية شويتين
البيتزا ?? الفراخ ?? البطاطس ?? السلطة ??
Diet house
شارع جامعة الدول العربية، المهندسين
القسم : طبخ
اضف تعليق