ما أحلى مشاركة البيتزا مع حبايبيك، تطلبوا كذا نوع، وتذوقوا من بعض، وتستمتعوا بالأطعمة المختلفة تماماً، وتعرفوا هل المطعم ده حلو فعلاً في كل الأنواع.

المطعم ده أنا متابعه م بداياته لما كان محل صغير وتوسّع وكبّر نفسه، بس يظل برضه صغير، بس محافظ على عجينته الرقيقة اللي تشبه البسكويت، رقيقة ومقرمشة، بس ساعات بتحرق منهم ومينفعش تتاكل غير سخنة، وهي سخنه تتاكل أكل.

اللي بيميزهم الجبنة نوعها نظيف جداً، والجنبة مش جبنة موتزريلا مفتتة كدا لا، لكشة جبنة قطعة كبيرة على بعضها والمورد نفسه اللي بيجيب منه توماس بيتزا من أروع بيتزات مصر، فرع الزمالك تحديداً.

المطعم ده صاحبه إيطالي ومراته مصرية، ناس شيك وودودين جداً، ابتدوا يتوسّعوا وعملوا محل آيس كريم اسمه جيلاتو ميو مش آيس كريم هوا جيلاتو معمول من عصير الفاكهة وطبيعي أكتر من الآيس كريم كتير.

البيتزا حل سريع للعشا ولذيذ وخفيف، ولما بتتعمل حلو بتبقى خطيرة :)

طلبت من عندهم..

 بيتزا أنشوجة وكابري وجمبري

كانت أحلى واحدة طعمها يجنن، الجبنة سايحة جميلة، والكابري عامل طعم جميل وبيليق ديما مع أكلات البحر عموماً، بس خصيصاً مع السلمون بيضيف طعم يكسر طعم السمك وبيسيب عطر في زورك، وذكرى جميلة بعد ما تخلص الأكل.

بيتزا تركي ومشروم

كانت حلوة بس مش مميزة، وطعمها مش قوي عشان المكونات طعمها مش قوي، بس ماضافوش حاجة تطعم سايبينها زي ما هي، يمكن الزبون اللي طالب المكونات دي ذوقه هادي فـ الأكل، الزعتر بس خالق مود حلو هوا اللي محليها يمكن.

بيتزا تونة وزيتون

دي كانت حلوة أوي والمكونات لايقة سوا وخفيفة والتونة مش زفرة.

زيت الزيتون عندهم مش مجرد زيت زيتون بيتحط معاه روز ماري وتوم وحاجات تانية خلطة إيطالية كدا بيخلي البيتزا ليها مذاق مختلف، محطوط في إزازة وبيتضاف للأكل لو عايز.

البيتزا دي ما يتحطش عليها كاتشاب، هيبوظها هي حلوة لوحدها كدا.

أنا بحب بيتزيتهم الحقيقة، وبحسها مختلفة وأسعاره كويسة بالنسبة لتوماس، بس لو بيتزا فشيخة وسي فود، يبقي توماس طبعاً، بس بقا غالي أوي للأسف!! وغلي أكتر وتوحش! بس يظل أفشخ بيتزا في مصر«بيتزا توماس»، وبعده بيتزا ميا ولابومبا.

بيتزا ميا، ? طه حسين، زمالك