المطبخ الياباني المطبخ المتميز جدا وسط كل مطابخ العالم واللي بيميزه وبينفرد تقريباً بنظام غذائي بيتكون من سمك و رز وصويا.

والمقصود من البساطة دي ان بأقل تدخل بشري نقدر نطلع بطبق مفيهوش اختراعات قد ما هو قريب لطبيعة مكوناته وطعمها الأصلي، عشان ميخفوش الطعم الحقيقي للمكونات لان طعمها هي من غير حاجة حلو.

اليابانيين شايفين ان أفضل طريقه للطبخ هي انك تبعد عن المبالغة يعني متحطش ??? نوع توابل وكذا مكون عشان تعمل طبق.

و ثبت علميا ان معظم المكونات اللي بيستعملوها بتساعد في التقليل من الاصابه بأمراض القلب وأنواع معينة من السرطان وكمان ليهم فوايد كتير مش بس بيحموا من أمراض زي مثلاً الصويا بتساعد في تحسين صحة العظام وبيعتبر هوا السر ورا رشاقة المواطنين اليابنيين وخصوصاً النساء.

حصلت تغييرات اجتماعية وسياسية ساعدت على تطور المطبخ الياباني وده ظهر بشكل واضح في القرن السادس، بدأت اليابان تتحول من دولة معتمدة على الصيد بس بأنها تزرع و بدأ الرز يشق طريقه لليابان من خلال الصين واللي اتأثروا بيها اليابانين وبثقافتها وأكلها كتير.

مش بس اتأثروا اليابانين بالصينين في الأكل بس، لا دول كمان أخدوا منهم أدوات الطعام والمطبخ ومنها عيدان الأكل أو الـ chop sticks اللي في القرن الثامن والتاسع مكنش بيالكل بيها غير النبلاء.

العيدان دي بيسموها «هاشي» و بيستخدموها ساعات شوكه وسكينه وهي عبارة عن قطعتين خشب و بيكونوا ملزوقين في بعض في التقديم عشان تتأكد انهم مستعملوش قبل كدا. و في السوشي بيستعملوا لالتقاط القطع وبياكلوا بيها النودلز كمان.

دي شوية من آداب الطعام عند أكل السوشي و بقية الاكل الياباني عشان يبقي عندكم معلومات وانتوا رايحين مطعم ياباني محترم إذا كان هنا أو برا مصر أو في اليابان:

– لو كنت بدأت أكل مينفعش تدي حد تاني أكل بالعيدان بتاعتك للعيدان بتاعته ولو عايز تدي لحد أكل من طبقك ممكن تطلب طبق صغير تديهوله فيه غير كدا قله أدب عندهم.

-لو بتاكل رز اياك تغرز العيدان عموديا في الرز عشان دي حاجه تدعو للتشاؤم في الثقافة اليابانية وكمان مينفعش تفضل تطعن العيدان في طبق الأكل وتقلب كدا في الأكل زي ما بنعمل لما نكون مش عاجبنا الأكل أو شبعنا.

-متشوحش بالعيدان برا طبق الأكل وتتكلم بيهم.

– متفضلش تنقل ايديك بالعيدان من طبق للتاني وانت بتاكل.

-اكيد هتقابلك صعوبات وانت بتستخدم العيدان بس بالوقت هتعرف تتعامل، امسك العيدان بصوباعك التخين ده وباللي جنبه وساعدهم بصوباعك اللي في النص الإبهام والسبابة والوسطى، بتمسكهم كويس وبعدين بتحرك بس العود اللي فوق اللي مسنود على الوسطى وبيحركه السبابة، الإبهام ثابت وساند العود الاولاني المهم انك لو مش عارف تتعامل عادي تاكل السوشي بايدك.

-بلاش تهزر وتلعب بالعيدان بأي شكل و بلاش تحك العيدان في بعض بشكل مستمر ده معناه عندهم ان انت شايف العيدان نوعها رخيص وعايز تطلع نشارة خشب منها! دي حاجة تزعجهم جداً.

-مينفعش متاكلش كل أكلك ولازم تمسح الأطباق بالمعنى الحرفي للكلمة ومينفعش تفضّل نوع عن نوع في الأكل دي حاجة غير لائقة في ثقافتهم اللي بتقدس مضغ الأكل بفم مقفول

-متترددش انك ترفع طبق الشوربة و تشرب منه أبدا الموضوع ده مسموح جدا ولو كنت بتاكل نودلز بشوربة ممكن تاكلها بالعيدان وفي نفس الوقت تشرب الشوربة من الطبق وتطلع صوت كمان وانت بتشفط المكونات الي في الشوربه ده بيدي مدلول ان الأكل شهي والحركة دي بتفتح نفسهم مش بضايقهم أبدا وبيحبوها

-شوربة الميسو من أشهر الشوربات اليابانية ومش بتتعامل معاملة الشوربات العادية الشوربة دي بيطلبوها بعد الطبق الرئيسي مش قبل

-لو رحت كلت في مطعم ياباني في الشارع مينفعش تستخدم الفوط بتاعت الايدين والفم والوش بعد الأكل، لأن المطاعم بتقدم فوط سخنة أو مرطبه ملفوفه في بلاستيك عشان تنضف بيها ايدك قبل الاكل مش بعده!

-بالنسبة للساشيمي

الواسابي بيتدهن علي الساشيمي وبعدها تلفه وتمسك الساشيمي بالعيدان وتاكله دا الصح اللي بيعملوه اليابانين واللي علمتهولي صديقة يابانية

لو هتاكل النجيري بايديك المفروض تمسكهم بالتلات صوابع اللي في النص والصباع الكبير يبقي ضاغط على قطعة السمكة ولما تيجي تنزله في الصويا صوص أو أي صوص لازم اللي يلمس -الصوص السمكة مش الرز لانك مش بتاكل رز بصوص انت مجرد بتضيف نكهة بسيطة للقطعة مش عايزها تسيطر على الطعم العام عشان تستمتع بطعم السوشي أصلاً اوعى تاكل النيجيري بالشوكة أو بالشوب ستيكس أو تطلب كاتشب جنبه أو تغطسه في صوص كتير كل دي حجات متعملهاش

بلاش تاكل النيجيري شوسي على قطمتين بس الماكي رولز على قطمتين عادي بس في القطمه التانيه متنزلش الباقي في الطبق تفضل معلقه في العيدان

-متخلطش ابدا الجنزبيل المخلل أو الـginger مع السوشي ولا تخلطه برضه مع الصويا صوص مش هيبقي طعمه حلو خالص وهيبقي أكنك بتاكل طبيخ نكهات كتير ملهاش طعم مفهوم.

الچينچر وظيفته في الطبق بيتاكل بين كل نوع ونوع عشان يطهر الفم و يزيل طعم السمكة اللي قبليها ويخليك مستعد للقطعة اللي بعديها ويخليك قادر تستطعمها وتحكم عليها بدقة

-مش مقبول أبداً تغمس الأكل في الصويا كتير أخرك تغمس طرف بس الأكل لو ساشيمي أو سوشي أو رز و لازم تحط الصويا في طبق صغير وتاخد منه ممنوع منعاً باتا تدلق شوية على الأكل كدا !

-لو عايز تستخدم خله السنان لازم تحط ايدك قدام بقك بس الأفضل انك تعمل كدا في الحمام

-متديش الشيف الفلوس في ايده اللي بيعمل الأكل مبيمسكش فلوس بايده اللي بيطبخ بيها
«عشان في مطاعم اللي بيقدم الاكل هوا الشيف»

-متاكلش لا في مواصلات عامة ولا وانت بتمشي دا برضه غير لائق بس بيحصل هناك ساعات.

-لو حفظتلك كام كلمة ياباني تبقي برنس ومفيش منك اتنين وهيشيلوك فوق راسهم «اريجاتوه جوزاهي ماهوسو» يعني شكراً !!ن دايما بيبدأوا الأكل بكلمة «إيتاداكيماس» ومعناها التقدير والامتنان يعني لكل اللي ساهموا في إعداد الطبق ده من أول المزارع والصياد وبعدين الشيف (ناس بتقدر وبتفهم)، ولما بيخلصوا أكل بيقولوا «جوتشيسوساماديشتا» ومعناها انهم عجبهم الأكل، وهم في العموم معروف عنهم انهم بيجاملوا طول ما هما بياكلوا شعب حبوب شويتين

الاكل الياباني أكل راسي ومتخططله ولو كلته على أصوله هتتبسطت.

تابع المقال السابق على الرابط التالي:

ما لا تعرفه عن السوشي (2)