النهاردة قررت اتبسط وأخلي أصحابي الاجانب يتعرفوا على حتت شعبية وعريقة في مصر خدت أصحابي جاين من كندا وروحنا الحسين أكلتهم أحلى حمام في مصر وكباب كمان

روحنا فرحات الحسين

طبعا كانوا خايفين و مش مصدقين انهم هياكلوا في مكان النضافة فيه مش أحسن حاجه طمنتهم ان ده مش غريب عندنا في الأماكن الشعبيه وان شا لله مش هيحصلهم حاجة بس بعد ما داقوا الاكل قالولي تحفه الطعم.

و هوا فعلا النهاردة الحمام كان تحفة مش زي ما باجي بليل بيبقي مش حلو

الحمام النهاردة كان مقرمش وماسك نفسه مش طري

الرز جوا كان مستوي وحلو جدا الاستمتاع بالنسبالي في االحمام هوا الرز وخلطته وطعامته عشان الحمام مجرد أزأزه اللحم فيه مش كتير بس اكلة ممتعة جدا بالنسبالي

والكباب والكفته وريش ضاني كمان طعمهم فشيييخ وملبسين ومشويين كويس اوي في طعامة كدا الاكل مش مجرد حاجه مشوية لا في طعم كدا بيوصل للمناطق اللي بتحسسك بالشبع و تقولها دانا مش بس هشبعك دانا هكبسك و مش هخلي عينك متشوفش اكل تاني وتضحك ضحكه شريرة و تجري تنزل المعدة

في اللحظة دي انا بكون ببلع بشوربة الحمام و باكل جناح الحمامه بمصمصه في استمتاع ونشوة رهيبة مع الرز اللي جوا اللي بمسك بطنها كدا زي الكونو ويقع منها الرز اكلها زي الايس كريم بس النسخه السخنه المولعه الحِرش اللي في اخره بدل شكولاته كبده و قوانص وهي المكافأة بتاعتك :)

الاكل كان فشيخ واتبسطنا بالتجربه

المكان بسيط جدا والقاعده في الشارع وفي دكانين كدا مفتوحين للي عايز يقعد جوا في حاره ضيقه جدا متفرعه من الشارع الرئيسي للحسين

الاسعار الحمام المحشي ?? كيلو كباب وكفتة ضاني ???

126 ش الازهر الازهر، القاهرة فرحات