اللي عايز يكرم حد بيعزمة علي أكله سمك المرة دي مش عارف أبدأ ازاي ولا أوصف إيه السمك دا يا جماعه أكله تعتبر زي المخدرات بالظبط بالنسبالي.

تاكلها من هنا تكون مبسوط و معدتك عامله تبوس في بطنك من جوا و تقولك تسلم يا برنس البرنسين تروح بس تشوف السرير إنسي إنك تصحي الا بعد?? ساعه علي الاقل بعد الأكله دي؟

أقول إيه علي الحاله اللي ببقا فيها و عيني اللي بتزوغ علي شوربات و أنواع رز و مكرونات و مقبلات سلاطات تفتح النفس مصمصه في كابوريا أو جندوفلي أو أي حاجه شبه دول في الاول عقبال ما تدخل علي التقيل المشوي و السنجاري و المقلي و الصينيه و الصياديه والمهازل دي كلها. عيشه تانيه و دماغ تانيه الله بجد.

الاكل كان :

الاول اختارت مقبلات من الصينيه الكبيرة اللي بيقدمهوالك تختار منها اخترت راهب ( بتنجان مشوي وعليه توابل و توم خلطه كدا ) كان يجنن و سلطه رنجه(بالبصل والطماطم و تتبيله برضه تاخد العقل لاني بموت في الرنجه المدخنه ) الرنجه كدا تدلخك في مود انك هتاكل اللي احلي منها كمان مع طعمها المدخن اللي عليه ليمون و بصل عاملين مزازة في بوقك جميله و طبعا خدت طحينه و ليمون الطحينه مظبوطه جدا و قوامها جميل.

قالي شوربه سي فود يا فندم قلتله امال انا جايليك ليه هتهزر؟ طبعااااااا ضحك و قالي حاضر و مشي و شويه و جبهالي وانا شايفها بتطلع دخان ريحيتها عبقت المكان تقليب طبعا عشان تسخن شكلها متسخنه جامد كانت خفيفه شويه و مكنش فيها مكونات كتير بس الطعم يجننن يجننن يجنن الخضرة اللي بتتحط عليها عامله مود تحفه و الجمبري و الكليماري و الحاجات الكتير اللي عايمه معاهم دول عشقي.

ابتدت اتحمس و قولت هيتأخروا لقيت فجاءة نازل عليا طبق المكرونه الفيونكه pow tie اللي بالجمبري و الصوص الابيض الجميييل بالشبت و الكرفس و نازل وراها سمكه سنجاري و سمكه مشويه متنضفه ( قاروس و دينيس) نص كيلو و نص كيلو قولت انها المعركه في ثانيه بعد دور السبع رجاله في بعض اللي كنت ناوي اتقمصه و اتشطر علي السمك و المكرونه جالي اللي اقوي مني ! الجمبري البتر فلاي الجبار ! دا يضعف اي حد بيعشق الجمبري والسمك !

منظرة لوحدة يشهي و يسجد البطن مستسلمه و متلهفه تحتفظ بيه لفتره جواها الجمبري ده بيتعمل بصوص الزبده و خلطه سريه و بيكون چامبو ومفتوح زي الفراشه كدا من النص ! جمبري يا جدعان محبتش قدة ولا هحب زيه سمكمك مشهور بيه و بيعمله احسن من قدورة و كاستن واللي في نفس المستوي ده ! البتر فلاي ده بتمصمص راسه بتبقي ملاينه صوص لازع من الليمون و الزبدة والهوت صوص و فيها لحم بسيط طعمه تحفه تمصمصه بعد ماتاكل لحمه الاساسي علي بق واحد و تفضل تمضع فيه و انت بتشفط الصوص بتاعه. في نفس الوقت و تغمض عينك متكولش معاه حاجه ولا تحطله طحينه (نقيي ترابيزة متطرفه في المكان عشان الفضايح) تجربه ولا اروع السمك كله كان تحفه و سخن و فريش حدا المكرونه حكايه تتحكي قبل النوم تجوع تقوم تاكل دراع اي حد جنبك طبيعي محدش هيلومك

سمكمك من احلي مطاعم مصر بتعمل سمك سمك حقيقي قدورة انا شايفه اسم بس و شهرة بس لسه واكل فيه قريب معجبنيش قولت اعوض نفسي بسمكمك بقا و عوضت الحقيقه كمان الخدمة ممتازة و الاكل ديما فريش

الاسعار طبعا غاليه لانه من اكبر المحلات و السمك اصلا غالي فا طبيعي الجمبري نص كيلو ??? السمكتين كل واحدة ب ?? المكرونه و الشوربه كل واحدة ب ?? المقبلات كل واحد ب ? الا الرنجه ب ?? السيرفيس و الضرييه غاليه ?? جنيه !!!

بس حقيقي من المطاعم اللي تستاهل يدفع فيها عشان اول حاجه انه سمك و سمك مستوي عالي و انواع تجنن و المطعم نضيف و مشهور و خدمه حلوة و اكل يخليك عايز تعيش في مطبخهم

Samakmak

شارع أحمد عرابي – المهندسين