بالهنا والشفا : مطعم أندريا مازال محتفظا برونقه
مطعم الطفولة و الذكريات بس مكنتش جيت من سنين طويلة نسيت الموضوع كله الحقيقه اتعسفت كتير عشان اروحله و كل ما اظبتها تبوظ.
اندريا فتح في السبعينات كان صاحبه الخواجه لوكا وكان في مكان قريب لمكانه دلوقتي في المريوطيه برضه على الترعه قبل ما يبقي فيه كوبري وعمارات ولما تعب الخواجه لوكا مسكه شريكه المصري وادا للخواجه نصيبه ورجع بلده اليونان عاش هناك والمحل كان زمان بتاع سمك ولما مسكه المصري قلبه فراخ مشويه بس بمذاق خاص.
دي الحكايه اللي حكاهالي الجرسون وانا جاي اجرب ازاي الفراخ مختلفه هنا الحقيقه المكان شيك وعنده مود مختلف البدايه وانا داخل لقيت فرن بلدي وعليه تلات ستات دمهم شربات قعدت اتكلم معاهم واكلوني عيش سخن واتصورنا مع بعض وكانوا مبسوطين اوي وانا كمان حبيتهم وقالولي (هنعملك احلي عيش يا عسل)
تفاءلت جدا بالبدايه المبشرة وقعدت كنت ميت من الجوع طلبت مزات الاول ومقبلات طلبت سلطه زبادي وخضار سلايس وخيار مخلل وطحينه وعيش طازة لسه معمول حالا وكبده فراخ وورق عنب باللحمة المفرومة
وطبعا طلبت فراخ وقولت مش هفوت السمان عشان مش ضامن اجي قريب (طفس اوي)
المزات الحقيقة معمولة بحرفية فظيعة كل حاجة واخدة حقها بس الزبادي كانت ناقصة ملح حطيتلها ملح ظبطت جدا الكبده خرافيه وورق العنب كان سخن وحلو بس انا مش بحبه باللحمه المفرومه فضلت اكل بالعيش السخن الفشيخ ده اللي اللبابه بتاعته طريه كدا وخفيفه بتقدر تشيل كميه كويسه من المزات عليها وتغلغل جواها بتدخل في بقك كل لقمه اكنها فطيره طريه سخنه جميله جدا مع كل قطمه متعة لا نهائية سقوعية الزبادي مع سخونيه العيش وخفته وطريانه حاجة مغرية بطريقة تجوع تحس انك عايز تاكل كل الكميه وتيجي تاني تجرب الفراخ
الفراخ بقا نزلت وسيبت كل اللي في ايدي عشان متحمس جدا ليها الحقيقه الفراخ المشويه اي حد يقدر يشوي بس الطعم ده مدوقتوش قبل كدا الزعتر والخلطه اللي كانوا عاملين بيها الفراخ ينهاررر ابيض مش عارف حقيقي اوصفه مفيش زفاره مفيش تلزيق في البق مفيش نشفان ولا تجليد في شوا مظبوط في طعم قوي في متعه بجد:)
السمان حقيقة اول مرة اكله حلو كدا في القاهرة بعد السمان السويسي طبعا ! كلتها في تكا كان يقرف حقيقي أنا مش هعرف اكل في تكا تاني بعد الاكل ده
انا حقيقي اتبسط اوي اوي اوي المكان والمود يجننوا وهجربها تاني اكيد لانه يتسحق زيارات كتيير
الاسعار : الفراخ كانت ب ?? النص المزات التلاته ب ?? جنيه الورق عنب و الكبده الواحد ب ?? العيش ال ? ب ? جنيه السيرفيس و التاكسس ?? جنيه المياه ? جنيه
اندريا المريوطيه، فيصل جيزة
القسم : طبخ
اضف تعليق