المحتوى الرئيسى

15 فايدة صحية وجمالية لزيت الزيتون مكنتيش تعرفيهم قبل كده

زيت الزيتون من الحاجات المعروفة من زمان وانه ليه فوايد صحية كتير جدا لو دخلناه واستخدمناه في الاكل بتاعنا منها انه بيساعد على الهضم, وبيزود من التمثيل الغذائي وبالتالي بيساعد على حرق دهون الجسم, وزيت الزيتون مش بس مفيد من الناحية الصحية كمان من الناحية الجمالية ليه فوايد كتير للبشرة والشعر حتى انه بقى يدخل في كتير من مستحضرات العناية الخاصة بالبشرة والشعر, والنهاردة هنعرف مع بعض مجموعة من فوايد زيت الزيتون الصحية والجمالية هتخلينا منستغناش عنه.

– فوايد زيت الزيتون الصحية والجمالية:

1- الوقاية من امراض القلب:

القلب يعتبر هو المحرك الاساسي في الجسم اللي بيضمن باقي الجسم بيشتغل بشكل سليم, وزيت الزيتون يعتبر من افضل الحاجات اللي بتساعد على حماية القلب من المشاكل اللي ممكن يتعرض لها, وده لانه غني بالدهون غير المشبعة وتقريبا بيتركب منها بنسبة 70% وده بيساعد الجسم على التخلص من المستويات العالية للكوليسترول وانخفاض مستوى الكوليسترول في الدم ده معناه ان القلب صحي والجسم سليم, وكوليسترول اقل يعني زيادة في تدفق الدم في جميع انحاء الجسم.

الوقاية من امراض القلب

2- تخفيض الكوليسترول في الدم:

زيادة نسبة الكوليسترول الضار في الجسم ده بيسبب تقريبا كل المشاكل الصحية اللي ممكن تحصل لنا زي امراض القلب, والاوعية الدموية اللي بتأثر بشكل مباشر على القلب, وكمان ممكن يسبب الاصابة بالسكتة الدماغية, ومن فوايد زيت الزيتون انه ممكن يحمينا من مخاطر الاصابة بالامراض دي لو دخلناه في نظامنا الغذائي, لانه بيعزز مستويات HDL اللي هو الكوليسترول الجيد  وبيخفض من نسبة مستويات LDL اللي هو الكوليسترول الضار, وزيت الزيتون كمان غني جدا بمضادات الاكسدة وده بيساعد على خفض مستوى الكوليسترول الضار في الجسم.

تخفيض الكوليسترول في الدم

3- بيساعد على تخسيس الوزن:

زيت الزيتون يعتبر مفتاح فعال جدا وسريع لتخسيس الوزن لو دخلناه في الاكل بتاعنا بشكل مستمر ومنتظم لانه بيساعد على هضم الاكل وبيعزز عملية التمثيل الغذائي لان لما بتكون عملية التمثيل الغذائي في الجسم بطيئة ده بيسبب تراكم الدهون بدل توفير الطاقة للجسم لكن زيت الزيتون بيحل المشكلة دي لانه غني بالدهون غير المشبعة الاحادية واللي معروف ان ليها تأثير كبير على الوزن.

بيساعد على تخسيس الوزن

4- بيأخر علامات الشيخوخة والتجاعيد:

زيت الزيتون ليه تأثير ايجابي في السيطرة على علامات الشيخوخة, ويعتبر علاج فعال في تقليل الخطوط الرفيعة والتجاعيد, والبقع الداكنة وغيرها من المشاكل اللي ممكن تظهر على البشرة, ولانه غني بالمواد المضادة للاكسدة ده بيساعد على تأخير علامات الشيخوخة وبيحافظ على صحة الجلد, وبالفعل زيت الزيتون داخل في كتير من منتجات العناية بالبشرة وفي كتير من العلاجات المنزلية والوصفات اللي احنا بنستخدمها لبشرتنا.

بيأخر علامات الشيخوخة والتجاعيد

5- يمنع سرطان الثدي:

سرطان الثدي من الامراض اللي زاد انتشارها جدا بالسنين الاخيرة وده مرتبط بشكل كبير بنظامنا الغذائي واسلوب حياتنا الغلط, ومن فوايد زيت الزيتون المهمة جدا انه ممكن يحمي من سرطان الثدي لان الدراسات اثبتت ان ليه تأثير ايجابي في السيطرة على نمو الخلايا السرطانية, وكمان مفيد جدا للقولون لانه غني بالالياف اللي بتساعد على طرد السموم من الجسم وتنضيف الامعاء تقريبا بنسبة 50% اكتر من اي نوع زيت تاني.

يمنع سرطان الثدي

6- يقلل من خطر الاصابة بالسكر من نوع 11:

مرض السكر بانواعه بيعاني منه نسبة كبيرة جدا من الناس ومن كل الاعمار وفي معظم الوقت بيكون وراثي لكن كمان في نسبة بتكون مش وراثية, وزيت الزيتون من الحاجات اللي بيوصي بيها الخبراء للتقليل من خطر الاصابة بمرض السكر, وده لانه زي ما قولنا بيقلل نسبة LDL اللي الكوليسترول الضار في الدم, وتاثيره على زيادة معدل الايض ودي كلها حاجات بتساعد على تقليل فرص الاصابة بمرض السكر.

يقلل من خطر الاصابة بالسكر من نوع 11 11

7- حماية وتقوية العظام:

النساء بشكل خاص بيعانوا دايما من مشاكل في العضم والام في الجسم خصوصا في الفترة اللي بعد انقطاع الدورة الشهرية, وزيت الزيتون من الحاجات اللي اثبتت الدراسات انه ليه تأثير ايجابي على الجسم انه بيحميه من الالم اللي ممكن يحصل بسبب ضعف العضم, وده لان زيت الزيتون بيحتوي على مادة اوستيوكالسين ودي ليها تأثير ايجابي في الحماية من امراض العضم والعضلات المرتبطة بالتقدم في السن لانها تعتبر نوع من البروتين اللي بيخلق درع واقي للجزء الخارجي من العضم وبتحميه من اي اضرار.

حماية وتقوية العظام

8- التقليل من التوتر والاكتئاب:

كتير مننا بيعاني من الضغوط النفسية والتوتر والاكتئاب وده اسبابه كتير ومختلفة واكيد الحالة النفسية دي بتأثر بشكل سلبي جدا على اجهزة الجسم والدماغ وده ممكن يسبب كتير من الامراض, لكن الدراسات اثبتت ان اللي بياكلوا حاجات فيها دهون غير مشبعة احادية بيقل عندهم نسبة التوتر والاكتئاب عن اللي بيعتمدوا في اكلهم على الدهون المشبعة, وزيت الزيتون بيحتوي على مادة البوليفينول اللي بتقلل الضغط على المخ وبيزود من قدرته التحليلية.

التقليل من التوتر والاكتئاب

9- التقليل من آلام الاذن:

زيت الزيتون من الحاجات اللي ممكن نستخدمها تقريبا للتخلص من كل مشاكل وآلام الاذن, وكمان بيساعد على التخلص من الشمع الزيادة المتراكم جوه الاذن, حطي زيت الزيتون في ازازة بقطارة ونامي على جنبك وحطي جوه الاذن كام نقطة منه وخليكي على الوضع ده من 10 – 15 دقيقة, وبعدها ممكن بعيدان القطن تجربي تشيلي الشمع الزيادة, بعد كده املي القطارة مية عشان تطردي اي شمع او بقايا زيت من الاذن وبعد ما تغسليها كويس من جوه تنشفيها.

التقليل من آلام الاذن

10- بيحافظ على صحة الكبد:

الكبد من اجهزة الجسم اللي بتتعرض لضغط كبير بسبب الاكسدة من الجذور الحرة اللي موجودة في الجسم, وزيت الزيتون لانه بيحتوي على مضادات الاكسدة بالتالي بيقلل من اثار الاكسدة الضارة وبيحمي انسجة الكبد من اي ضرر, وبيساعد اجهزة الجسم كلها انها تشتغل بشكل سليم وصحي.

بيحافظ على صحة الكبد

11- التخلص من رائحة الفم الكريهة:

من المشاكل المحرجة جدا هي رائحة الفم الكريهة والمشكلة دي ممكن تخلينا نبعد عن الناس عشان منتعرضش لمواقف محرجة, لكن زيت الزيتون من الحاجات اللي ممكن تحل لنا المشكلة دي, اخلطي معلقة صغيرة من زيت الزيتون مع معلقة صغيرة من عصير الليمون وخديهم كل يوم الصبح على الريق على معدة فاضية, الطريقة دي هتقضي على اي ريحة كريهة لانها هتقتل البكتيريا اللي بتبقى موجودة على اللسان او داخل القناة الهضمية اللي ممكن تكون بتسبب اي ريحة كريهة.

التخلص من رائحة الفم الكريهة

12- مزيل مكياج طبيعي:

من فوايد زيت الزيتون انه يعتبر من مزيلات المكياج الطبيعية والغير مكلفة, بس امسحي وشك بقطنة فيها زيت زيتون هيزيل اي اثار مكياج وهينضف البشرة ده غير انه هيساعد على ترطيبها.

مزيل مكياج طبيعي

13- مساج للجسم:

تقريبا كل النساء بيعانوا من الم العضلات والام الضهر بعد الولادة وده اكيد شيء طبيعي جدا, لكن ممكن التخلص من الالام دي بطريقة بسيطة جدا عن طريق التدليك بزيت الزيتون بشكل يومي لانه بيساعد جدا على الاسترخاء البدني والعقلي, وينصح بعمل المساج قبل وبعد الولادة لانه بيساعد على استرخاء العضلات, لان زيت الزيتون غني بخصائص مضادة للالتهاب واللي بتساعد في التقليل من علامات الالتهاب الموجودة في العضلات.

مساج للجسم

14- مرطب للشعر:

لكل اللي بيعانوا من جفاف وتجعد وخشونة الشعر الحل بسيط جدا للمشاكل دي وهو زيت الزيتون يعتبر علاج فعال جدا لمشاكل الشعر, بيساعد على ترطيبه وعلاج جفاف وتجعد الشعر وبيساعد على زيادة نموه, سخني شوية زيت زيتون ودلكي بيهم فروة الراس والشعر عشان تغذيه وترطبيه, ومش بس للشعر كمان بيصلح الجلد التالف والجاف اللي حوالين الضوافر.

مرطب للشعر

15- العناية بالايد والقدمين:

الايد والقدمين من اكتر الحاجات اللي ممكن تتعرض لمشاكل كتير من جفاف وجلد ميت وغيرها من المشاكل اللي ممكن تقابلنا, وزيت الزيتون من الحاجات اللي الخبراء بينصحوا بيها جدا لاستخدامه لمشاكل الايد والقدمين, دلكي الايد والقدمين كل يوم قبل النوم بكمية بسيطة من زيت الزيتون الطريقة دي هتساعد جدا على ترطيبهم ومش بس كده كمان هتأخر علامات الشيخوخة منهم.

العناية بالايد والقدمين

– نصايح لاستخدام زيت الزيتون:

1- لما نيجي نستخدم زيت الزيتون لاي حاجة نخلي بالنا لو هنسخنه منسيبهوش يسخن اوي يعني ندفيه بس عشان ميفقدش فوايدة والعناصر اللي فيه.

2- بالنسبة للحوامل يخلوا بالهم من الكمية ويستخدموه بكميات قليلة.

3- منستخدمش زيت الزيتون على اي جروح الا بعد استشارة الدكتور.

4- الافضل اننا نخزن زيت الزيتون في مكان بعيد عن الشمس والحرارة عشان نحافظ عليه صحي لاطول فترة ممكنة.

فوايد زيت الزيتون الصحية والجمالية

شوفوا كمان 7 ماسكات بزيت الزيتون لحل كل مشاكل الشعر

ماسكات بزيت الزيتون لجمال شعركماسكات بزيت الزيتون لجمال شعرك


لا تنسى تقييم الموضوع

القسم : الاسره والصحة

المصدر : ÈäÇÊ ÍæÇÁ

قد يعجبك أيضاً

اضف تعليق

فكرة الموقع : "كله لك" هو شراكة بيننا و بينكم ..دورنا : انتقاء أفضل الموضوعات المنشورة و المتداولة علي المواقع ... دوركم : تقييم المحتوي للتأكيد علي أهميته أو إرشادنا لحذفه

لمعرفة المزيد عن الموقع اضغط هنا