المحتوى الرئيسى

بالهنا والشفا من دبي The Irish Village متعة بلا حدود


تقرير النهارده ممتع للعين، عن The Irish Village رحت مكان في مزيكا لايف بيغنوا بوب وروك آند رول، بيعزلك تماماً عن مدينة دبي الصاخبة، من الشجر العالي اللي بيخبي كل أنواع الفخامة في البنايات وبيدخلك في مود بسيط، وفجأة بتنتقل لأوروبا القديمة أو الريف.
احنا في الشتا والناس كلهم مصيفين، وفي بحيرة مياه فيها بط ووز وكل الناس معاها أطفالها وبيرموا للبط أكل، وجنينه تجنن ولعب أطفال في الناحية التانية.
المزيكا اللايف دي، تخليك قاعد متحمس طول الوقت وبترقص في مكانك وبتصقف للمغني بعد كل أغنية، ومسلي جداً الموضوع ده، والديكور بتاع المطاعم متقسم لكذا محل بأسماء مختلفة وألوان مبهجة، والترابيزات كلها خشب، وفي منها عالي وواطي وحلوين وستاليهم بسيط وراقي والعواميد حتى شكلها حلو، والشجر المقصوص، وكلاب كتير بيجروا وبيلعبوا، حقيقي طخلت انبهرت وتبشرت خير بالمكان.
The Irish Village
لحد ما قابلت الجرسون الإيرلندي غير متفهم إن أنا مش عارف أفهم الأكسنت بتاعته وقولتله براحهة متتكلمش بسرعة، بس هو كشخص، واضح إن عنده مشاكل في الكلام، وكمان بيطرطش مياه من بقه على الناس وهو بيكلمهم، واضطريت أروح الحمام أغسل وشي وإيدي بعد ما طلبت الأوردر اللي قعدت ساعة أقوله إني عايز أجرب الحاجات الإيرلندية التقليدية، وهو يقولي كله حلو كله حلو! مش فاهم إني جاي أخوض التجربة، مع إني بكلمه إنجليزي سليم وواضح! كانت حقيقي أزمة، هو بيتهته وبتفتف، أنا محبتش اللي حصل أبداً وكمان طلب مني الفيزا بعد ما خد الأوردر وبيقولي خدها وأنت ماشي، معرفش إيه الجو الرخيص ده! حركة في منتهى قلة الذوق وإديتهاله بعد ما مفهمتش منه ليه بيعمل كده لحد دلوقتي!
The Irish Village
المهم طلبت أطباق إيرلندية. طلبت اختيار الشيف للروست بيف، معاه يورك شاير بودينج الإنجليزي وبطاطس روست في الفرن وبطاطس مهروسة، وخضار الموسم، وصوص جريفي.
الطبق غير متوافق، كمية النشويات زيادة جده، وده في علم تكوين الطبق وتقديمه للزبون غير مقبول تماماً نوعين نشويات. بس للأسف شعوب أوروبا وأميركا بيعملوا كده كتير. عشان تتريقوا على الكشري كويس.
IMG_8072 التقديم كمان كان منعكش جداً ومفيش مساحة أكل فيها أصلاً، لازم الشيف يسيبلي مساحة أحرك فيها الشوكة والسكينة، وده كمان خطأ فادح في القوانين نفسها بتاعت فنون تقديم الأطباق والتزيين في المطاعم والفنادق.
المهم نيجي للطعم.
الروستد بيف طعمه حلو أوي، بس الجريفي طعمه عجيب، سألت الجرسون، قالي ده على طريقتنا.
البطاطس المهروسة بيتي جداً، مش كريمي، بس عجبتني أوي، من أكتر الحاجات اللي عجبتني.
البطاطس المخبوزة في الفرن وحشة ومش مستوية كويس، متواضع طعمها.
الخضار المشكل، البروكلي والخضار السوتيه، ملهمش أي طعم ومش متبلين ومش جايبين أي ملح أو فلفل ولا كاتشاب ولا أي حاجة، حتى تتبل بيها، وطلبت، جيه بعد ساعة، بعد ما خلصت أكل وسيبت نصه.
IMG_8087
طلبت كمان، نص فرخة مشوية في الفرن، وبتتقدم مع الجزر وبطاطس مهروسة وجريفي صوص.
الفراخ متبلة بزعتر وفلفل أسود وصوص أحمر يجننن، الفراخ مستوية حلو أوي وطعمه لطيف جداً.
الجزر مهروس ومسلوق مسكر زيادة أوي، مش مملح أبداً، طعمه متوسط.
IMG_8078
الطبق الجانبي كان بسلة مهروسة. البسلة ملهاش أي طعم، ولا معنى مجرد بسلة مسلوقة، رخمة جداً، مش متبلة خالص، معرفش هما في العادي بيقدموها كده، ولا لأ، بس فعلاً ملهاش أي طعم.
ومعاها عيش صودا إيرلندي، شكله وطعمه زي البسيسة وريحته كمان بالضبط، غريب أوي، بس مش مسكر، هو ميكس بين الإنجليش كيك والبسيسية، عجبني بس تقيل أوي وطعمه حلو جداً، وزبدة كريمي لورباك.
وقولت عايز أي منتج يتشرب إيرلندي، سألت الجرسون، قالي عصير برتقال، الجرسون قالي إنهم بيشربوا برتقال على أساس بلدهم الوحيدة اللي فيها برتقال -بيتشغلني- وسألته عن صودا نوع إيرلندي، قالي مفيش!
الخدمة هنا وحشة جداً، الجرسون نزل المشروبات قبل الأكل، ونزل الأكل ومنزلش شوك ومعالق غير أما طلبت أنا والأكل برد، الأكل أصلاً نازل بارد.
الجرسون والأكل متواضعين بعض الشيء، بس الحقيقة المكان بديع بكل ما تحمله الكلمة، وملهم، تيجي تتبسط بالمزيكا والفيو ولمة أصحابك مع مشروبات وتمشي.
منصحش بالأكل أوي، إلا لو مش فارق معاك الطعم، هتشبع من الكميات!

الأسعار بالدرهم


برتقال 20 روست بيف 64 عيش صودا 10 فراخ 60 بسلة مهروسة 16 خضار مشكل 16
عنوان المطعم The Irish Village ,garhoud, dubai


لا تنسى تقييم الموضوع

القسم : طبخ

المصدر : كسرة

قد يعجبك أيضاً

اضف تعليق