المحتوى الرئيسى

فقط في مصر أنواع السايس في مصر لا بدّ أنك قابلت أحدهم

في إطار مناقشة ظاهرة البيه السايس، اتكلمنا في الجزء الأول عن بداية ظهور مصطلح السايس في مصر وناقشنا بطريقة ساخرة الخطوات والمهارت المطلوبة عشان تكون سايس محصلتش لو بتفكر تعمل كاريير شيفت، وده رابط الجزء الأول بصوا بصة لو بتحبوا. النهارده بقى هنتكلم عن أنواع السايس المختلفة بتصنيفي الشخصي، ولو إنت عايش معانا في مصر المحروسة، هتلاقي نفسك بتتعامل على أقل تقدير مع نوع واحد منهم بصفة يومية. مبدئياً، كده لازم نتفق أولاً، إن الواحد عشان يلاقي ركنة أساساً في مصر، ده أصعب بكتير من إن الزمالك ياخد الدوري!وثانياً: إن اللي عنده عربية مش شرط يكون عنده القدرة المادية لدفع مبالغ من الفلوس بشكل يومي، مقابل إنه يسيب عربيته فى مكان ما في الشارع، لحد ما يخلص مشاويره، السايس كده هيحتاج ميزانية لوحده شهرياً، وده مش منطقي أبداً، أنا شخصياً عندي في حياتي 4 أنواع من السايس كالآتي:

1- سايس البيت

السايس في مصرMeme Dad، كسرة الشارع اللي أنا ساكنة فيه، بعد ما كان هادي ومعندناش مشاكل في الركنة أبداً، لأجل حظنا العثر من كام سنة إتفتح فيه جيش من الكافيهات، وبالتبعية ظهر البيه السايس، وبقى بيشاركنا في الركنة رواد الكافيهات دي، وبقى يوماتي لو نجحت وركنت تحت بيتنا، شخص ما يُدعى السايس، يجي بكل تناحة وبجاحة يسألني: "هتطوّلي في المكان؟!" وأنا طبعاً برد عليه وأقوله: "لا ابداً طالعة بيتنا أدخل الحمام وبعدين هنام بعد إذنك وأنزل تاني بكره الصبح"!

2- سايس الشغل

سايس الشغلMeme Dad، كسرة عادة بركن جنب الشغل في مكاني المفضل اللي مبستغناش عنه أبداً الصف التاني، وليا مغامرة عظيمة بهذا الخصوص ممكن تقروها هنا: ركنة صف تاني، المهم، في يوم ملاقتش مكان جنب الشغل، وبأعجوبة لقيت ركنة بعيييدة جداً عن الشغل -جنب بيتنا تقريباً!- لحد كده ومفيش مشاكل غير إني هرجع كل ده تاني مشي، أوم إيه بعد ما ركنت لسه هنزل من العربية، ببص لقيت السايس نفسه ظهر فجأة من الفراغ وبيفتحلي الباب وبيقول: بابتسامة سمجة: "حمد الله عالسلامة يا فندم"، وده مثال للقدرات الخارقة للسايس، وطبعاً استحق عنها وبجدارة إنه ياخد مني الإتاوة!

3- سايس المشاوير

سايس المشاويرMeme Dad، كسرة ساعات زي البشر عادي، مثلاً أقرر أشتري شوية حاجات وأنا مروحة البيت، وبالتالي بقف بالعربية كل دقيقتين، وطبعاً بدفع الإتاوة في كل وقفة كأني ركنة في ريسيبشن بيتهم، وبكده الواحد ممكن يلاقي نفسه بيدفع مرتبه كله للسايس وهو في طريقه للبيت، وطبعاً زي منتو عارفين أنا كمان بدفع تحت بيتنا لو فلحت ولقيت مكان أركن!

4- السايس الكُشك

سايس الكشكMeme Dad، كسرة فيه كمان السايس صاحب الكُشك، والسايس صاحب محل العصير، وده بقى نوع تاني من فرض السيطرة، كل صاحب كشك بيحط إيده على حتة الأرض اللي أُدامه بعقد شفوي برضه بينه وبين نفسه، وبيمنع أي حد إنه يركن فيها، بحجة إنه مكان رزق، وبالتالي الشارع كله تقريباً بقى متباع! ودي نبذه مختصرة عن الظاهرة البايخة دي، والمواقف اللي بتحصلّنا يومياً في شوارع مصر، شاركوني مواقفكم مع السايس في التعليقات، واللي عنده حلول مبتكرة للمعاناة اليومية اللي اتكتبت علينا دي، يلحقنا بيها، وختاماً عزيزي معالي البيه السايس، رفقاً بالمواطن وبمرارته، وشكراً.

وده فيديو لمواطن فاضل حاول يلاقي حل مبتكر لأزمة السايس اللي في كل مكان دايس!

youtu.be


لا تنسى تقييم الموضوع

القسم : كوميكس ونكت

المصدر : ßÓÑÉ

قد يعجبك أيضاً

اضف تعليق

فكرة الموقع : "كله لك" هو شراكة بيننا و بينكم ..دورنا : انتقاء أفضل الموضوعات المنشورة و المتداولة علي المواقع ... دوركم : تقييم المحتوي للتأكيد علي أهميته أو إرشادنا لحذفه

لمعرفة المزيد عن الموقع اضغط هنا