بالهنا والشفا: مطعم لقمة عيش.. تجربة لطيفة

النهاردة مكنتش مقرّر أنزل؛ كنت مصاب بإحباط كتير وكمان بطني بقالها كتير تعبانه من الإهمال اللي بقابله في مطاعم مصر، ومن كتر الإهمال مبقتش عارف أنا بتعب من أنهي مطعم..

النهاردة نزلت متأخر جداً الساعة 12 ونص قاصد محل جديد في الزمالك صغير جداً اسمه «لقمة عيش»

لقيتهم بيقفلوا خلاص نور اليافطة..

دخلت قعدت أهزر مع الناس عشان أنا برخم عليهم وهخليهم ميقفلوش..

الناس كانوا مرحبين بس مكنش فيه اختيارات كتير للخضار، وأنا حبيت أجرب ساندوتش وشوية مقبلات جنبة كدا للمزمزة وكمان عشان أشبع ومتعبش، كلها مخبوزات وخضار.

المكان ضيق وصغير بس ديكوره جميل ومختلف، هو ميكس فوق الترابيزات تحسها قديمة بس متعقلة في السقف بعامود ستانلس مودرن والكراسي قديمة بعض الشيء، بس الأرضيات وبقية الديكور مودرن، هو الديكور معكوك بس في الآخر مش مزعج.

خلينا نحكم على الأكل وهو الأهم بالنسبالي..

طلبت عيش بانيني أبيض وروست بيف كولد كتس مش مدخن وسويت كورن وجرجير وجبنة كريم تشيز..

الجبنة مش غنية لأن نوعها بريزيدون بالقشطة مش زي فلادلفيا خالص، والجرجير كان دبلان لا وجود للسويت كورن مشوفتوش ومحستش بيه، العيش كان كويس والكولد كاتس كانت لطيفه بس رفيعه شوية.

في المجمل الساندوتش مش مبهر وفاضي شوية.

الـ pepperoni bun أو الفطيرة الصغيرة المخبوزة وجواها بيبروني كانت حلوة بس اتأخرت ومنزلتش مع الأكل لسبب غير معلوم، وهي جاهزة وبس هتتسخن ومفيهاش أي اختراع، بس كانت لطيفة بس مش مختلفة أو فيها ابتكار.

طلبت اتنين دونتس صغيرين فراولة والتانية سينامون وواحدة كبيرة شكولاتة. الدونتس المفروض تبقى هشة وتدوب في البق.

الحقيقه الدونتس هنا ناشفة شوية ممكن عشان آخر اليوم بس مش مبرر.

بس الدونتس مش مزيته والفيلينج والجليز اللي بالرفراولة كان طعمهم حلوين والسكر مظبوط جداً، بس عيبها أنها مش هشة ومش طرية كفاية إنها تدوب في بقي، والفيلينج مش كتير برضه.

الدونتس التاني كان سينامون؛ الملحوظة نفسها بتاعت العجينه إنها مش هشة، بس دي ألذ من الفراولة، عجبني أكتر شكلها تشبه فستان بنت أنيقة رايحة سهرة في مناسبة مهمة، لون الفستان بتاعها درجات البني زي الدونتسايه دي :)

الدونتس بني في بيچ والقرفة بني والسكر والجليز أوف وايت وبيچ حبيتها وحبيت الحشو بتاعها، كريمة خفيفة لذيذة سكرها معتدل.

التالت اللي كان بالشكولاتة كان الملحوظات نفسها وكان في المجمل معقول.

المشروب كان نوتيلا وقهوة وكريم شانتيه ده كان متعة حقيقة، طعم القهوة المركز طعم الكريم شانتيه المركز، طعم النوتيلا المركز مع بعض، وكنت بدوق أول ما نزلي كل واحد على حدة، واتبسطت جدا بطعم التلاتة والنوتيلا حقيقة، مش تقليد، عجبني المشروب رغم أني مفهمتوش أشربه ولا أكله! ولا أعمل إيه، أنا كلت منه شوية وشربت شوية وده بسطتني :)