المحتوى الرئيسى

5 أكلات شائعة في جدة لكنها ليست محلية لا تقرأ هذا المقال إذا كنت تحبها

في السعودية كثير من الأكلات غير السعودية ولكنها تعتبر اكلات شعبية من قلب الشارع السعودي، تخيلوا كم هو مضحك أن نعشق هذه المأكولات ونحن لا نجيد تحضيرها داخل منازلنا؛ لأنها تكون أطعم وأشهى، وهي من صنع أهل بلدها وبأيديهم الماهرة وببهاراتهم الخاصة.

1- منتو وفرموزا

إنها من الأكلات الأكثر تداولاً في جدة من حيث إنها أكلة بخارية وتصنع بطريقة خاصة في قدر خاص لا يصنع به الأكل العادي، وطبعاً ما أوصف لكم طعم المنتو وهو ساخن مع الشطة اللي تخلي طعم المنتو شي خرافة. عشان أوضح لكم الفرق بين المنتو والفرموزا، المنتو: هو اللي بالعجين المطبوخ بالبخار والحشوة اللي داخله غالباً ما تكون حشوة الفرموزا نفسها. أما الفرموزا: يكون مطبوخ بالفرن.

2- شباتي

الخبز الباكستاني اللي ماله غنى في كثير من البوفيهات التي تقدم الفطور، وأكيد ما أوصفلكم طعم الشباتي مع الجبنة السائلة أو مع البيض، وتم تعديل النسخة التقليدية منه وصارت بالبطاطس أو بالكراث، وكمان تم تطويره ليقتحم كثير من المطاعم ويقدم جنباً إلى جنب مع أشهر أنواع المخبوزات. الصراحة يستاهل، وطبعاً في كثير من المطاعم الباكستانية اللي تتميز بتقديم الإدامات اللي ما يكتمل طعمها إلا بالشباتي أو الخبز أو البراوطه. تعددت الأسماء والطعم واحد.

3- شيّه

14 ريال تأكّل شخصين أحلى لحم أضلاع وكمان سواكني، يعني أحلى من كده ما أعتقد فيه. وطبعاً هذا كله مع الأكلة السودانية اللي اخترقت بطون المجتمع السعودي عامة والجداوي خاصة أكلة الشيّه السودانية الأصل، من أهم الأكلات اللي موجودة في جدة خصوصاً؛ إنه لها طريقة طبخ مو بعيدة كثير عن المظبي لأنها تنطبخ على الجمر ويجي معها الشطة الخضراء، اللي تعطي الأكل الكثير من النكهة والطعم. يعني ما راح توقف أكل.

4- المقلقل

أقول وأحكي إيه عن المقلقل اللي صار واحد من أهم الأكلات الشعبية في السعودية وفي جدة. المقلقل اكتسح الصفوف الأولى في الفطور والغدا والعشا، يعني وجبة ممكن تاكلها في أي وقت وفي أي مكان. تنفع ساندويتش وتنفع على صحن وتاكلها بالخبز ولو مقطع عليها شوية فلفل أخضر، وعليها رشة كمون وجنبه البسباس العدني، الصراحة لا تقاوم وتصير أحلى وأحلى. وهذه الأكلة جايتنا من المطبخ اليمني اللي يتشابه في كثير من الأوقات مع المطبخ السعودي.

5- سيريه

وما أقدر أغفل أو أتجاهل الإقبال منقطع النظير على السيريه واللي هي أكلة أفريقية من نيجيريا، وعبارة عن لحم بقري مشوي ومتبل بالبهارات الخاصة، اللي مدري بصراحة متى راح نعرف هذي الخلطات، ويقدم مع الليمون وشرائح البصل، وفي ناس تحب تاكل معها زبادي وفلفل تكروني "الياجي" اللي يشعلل الأكلة، وعشان يصير عشت التجربة مضبوط لازم تحبس بعصير الفروفرو أو عصير الجي، ونحذر السواقة بعد هذه الوجبة الخطيرة. والجدير بالذكر إنه حتى البنات صاروا يحبوا هذه الأكلة، ويروحوا للكرنتينا في مطعم الشباب ويطلبوها من عقر دارها إن صح التعبير، فلا يسوقوها علينا.

كلنا نحب نجرب الأكلات الجديدة، وبنستمتع بتنوع النكهات والبهارات، ونتعرف على مطابخ مختلفة في العالم، وأحياناً بنتعلق في الأكلات لدرجة إننا ممكن ناكلها كل يوم، وكمان ممكن نتعلم نطبخها بأنفسنا، والأحلى كمان لو عرفنا إيش أصول الأكلات اللي نحبها ولا تنسوا الخلطات السرية. أعطوني فين أحسن الاماكن اللي أكلتوا فيها هذي الأكلات، ولو عندكم اقتراحات لأكلات ثانية أنا في انتظار تعليقاتكم ومشاركتكم.


لا تنسى تقييم الموضوع

القسم : طبخ

المصدر : كسرة

قد يعجبك أيضاً

اضف تعليق

فكرة الموقع : "كله لك" هو شراكة بيننا و بينكم ..دورنا : انتقاء أفضل الموضوعات المنشورة و المتداولة علي المواقع ... دوركم : تقييم المحتوي للتأكيد علي أهميته أو إرشادنا لحذفه

لمعرفة المزيد عن الموقع اضغط هنا