المحتوى الرئيسى

ازاي تختاري البرايمر المناسب لنوع بشرتك

البرايمر من الخطوات اللي بتساعد على تثبيت المكياج وبتخلي شكل البشرة احسن لكن في الغالب كتير من البنات مش بتعرف تختار البرايمر المناسب لنوع بشرتها لان كل بشرة اكيد ليها احتياجات مختلفة, وبرغم انه ممكن يكون في اوقات كتير بنتجاهل البرايمر ومش بنحطه خصوصا في مكياج الصبح او المكياج اليومي لكن هو خطوة مهمة جدا وهتحسوا بفرق في المكياج لما تستخدموه, والنهاردة من خلال موضوعنا هنتعرف بالتفصيل على البرايمر وفوايدة وايه البرايمر المناسب لنوع بشرتك.

– ايه هو البرايمر ؟

للي مش عارفين بالظبط ايه هو البرايمر او ايه هي وظيفته واهميته للبشرة, هو عبارة عن كريم شفاف من غير لون, بيساعدك انك تحطي المكياج على البشرة بشكل اسهل, بيثبت المكياج لفترة اطول, تقليل حجم مسام البشرة وبيحسن شكل البشرة بشكل عام.

البرايمر ليه وظيفة تانية مهمة جدا كتير مننا بيعاني من تغيير لون كريم الاساس بعد ما بيتحط على البشرة بيتأكسد ولونه بيغمق لكن البرايمر هيمنع المشكلة دي لانه هيعمل حاجز بين كريم الاساس والبشرة وهيمنعه انه يتأكسد.

كمان بعض انواع البرايمر تعتبر مصحح للون البشرة, بيداري العيوب, بيرطب البشرة, بيوفر حماية من الشمس, بيكافح الشيخوخة وحب الشباب.

– ازاي تختاري البرايمر المناسب لنوع بشرتك:

عشان البرايمر يديكي النتيجة المطلوبة لازم تختاري البرايمر المناسب لنوع بشرتك.

1- البرايمر المناسب للبشرة العادية:

لو بشرتك عادية ده معناه ان مسام البشرة عندك حجمها عادي يعني مش كبيرة ولا صغيرة يعني مش بتفرز دهون زيادة ولا جافة, وفي الحالة دي انتي مش محتاجة نوع برايمر من اللي بيطفي لمعة البشرة هتكوني محتاجة بس البرايمر اللي يخلي المكياج بتاعك يدوم فترة طويلة مع عامل حماية من الشمس, والبشرة العادية غالبا مش بتعاني من مشاكل البشرة زي الاحمرار او الحبوب او اي عيوب تانية في البشرة عشان كده البرايمر ممكن يكون بديل لكريم الاساس بشرتك مش هتبقى محتاجة اكتر منه عشان ينوره ويطلع شكله حلو.

افضل انواع البرايمر للبشرة العادية: لوريال Primer L’Oreal Professional Studio Secrets, سماش بوكس Primer Smashbox Photo Finish, ميك اب فورايفر Make Up For Ever Smoothing Primer.

افضل انواع البرايمر المناسب لنوع بشرتكافضل انواع البرايمر المناسب لنوع بشرتك

2- البرايمر المناسب للبشرة الدهنية:

لو بشرتك دهنية فانتي اكيد محتاجة نوع البرايمر اللي بيطفي لمعة البشرة والوقاية من افراز الدهون واللمعة على مدار اليوم, لان البشرة الدهنية بتكون مسامات البشرة فيها كبيرة وبالتالي بتفرز دهون كتير والبرايمر هيساعد على تقليل حجم المسام وعشان البشرة الدهنية معرضة لحب الشباب هتبقى محتاجة نوع البرايمر المكافح لحب الشباب.

افضل انواع البرايمر المناسبة للبشرة الدهنية: مايبيلين Maybelline Baby Skin, برايمر بينفيت Primer The Porefessional Benefit , فلورمار Primer Flormar illuminating, لوريال PrimerL’Oreal Infallible, سماش بوكس Primer Smashbox Photo Finish, ميك اب فورايفر Makeup Forever Mattifying Primer.

افضل انواع البرايمر المناسب لنوع بشرتكافضل انواع البرايمر المناسب لنوع بشرتك

3- البرايمر المناسب للبشرة الجافة:

البشرة الجافة بتكون محتاجة ترطيب زيادة وبالتالي انتي محتاجة برايمر يساعد على ترطيبها ويديها ضي وينورها, والبشرة الجافة اكتر بشرة صعبة في اختيار نوع البرايمر المناسب لان لازم لما تيجي تختاري تجيبي النوع اللي يديكي ترطيب عالي وفي نفس الوقت خفيف على البشرة.

افضل انواع البرايمر للبشرة الجافة: لوريال Primer L’Oreal Professional Studio Secrets, ميك اب فورايفر Primer Makeup Forever HD Microperfecting و Nourishing Primer, ماك MAC Prep Prime , مايبيلين Maybelline Dream Smooth Primer, ريفلون Primer Revlon Photoready.

افضل انواع البرايمر المناسب لنوع بشرتكافضل انواع البرايمر المناسب لنوع بشرتك

4- البرايمر المناسب للبشرة المختلطة:

البشرة المختلطة اللي بتكون جامعة ما بين البشرة الدهنية في منطقة التي زون وباقي البشرة بتكون جافة, وفي الحالة دي قدامك اختيارين انك تختاري برايمر محايد اللي يكون مش مطفي بنسبة مية في المية وفي نفس الوقت ميعملش لمعة للبشرة, وهتكون مهمتة الاساسية هي تثبيت المكياج لفترة طويلة.

او تختاري نوعين برايمر نوع للبشرة الدهنية تحطيه على منطقة التي زون ونوع تاني لباقي اجزاء البشرة اللي بتكون جافة.

افضل انواع البرايمر للبشرة المختلطة: سماش بوكس Smashbox Photo Finish, بينفيت Primer The Porefessional Benefit, ميك اب فورايفر Make Up For Ever Mattifing Primer.

افضل انواع البرايمر المناسب لنوع بشرتكافضل انواع البرايمر المناسب لنوع بشرتك

5- البرايمر المناسب للبشرة اللي بتعاني من التجاعيد:

البرايمر يعتبر من الخطوات المهمة بشكل خاص للبشرة اللي بتعاني من التجاعيد لانه بيساعد انه يملى التجاعيد وفي الحالة دي هتكوني محتاجة برايمر يدي ترطيب للبشرة وفي نفس الوقت من غير لمعة مع واقي من الشمس وعناصر مكافحة للشيخوخة والمواد المضادة للأكسدة عشان يكون ليها تأثير ايجابي على صحة البشرة.

افضل انواع البرايمر للبشرة اللي بتعاني من التجاعيد: سماش بوكس Smashbox Photo Finish Luminizing Primer, ريفلون Primer Revlon Photoready, ميك اب فورايفر Make Up For Ever Smoothing Primer.

افضل انواع البرايمر المناسب لنوع بشرتكافضل انواع البرايمر المناسب لنوع بشرتك

6- البرايمر المناسب للبشرة الحساسة:

البرايمر ممتاز للبشرة الحساسة لانه بيعمل حاجز او طبقة اضافية بتحمي البشرة من العوامل الخارجية اللي ممكن تضرها, وانسب انواع البرايمر للبشرة الحساسة اللي بتكون فيها نسبة عطور منخفضة عشان متسببش اي تهيج للجلد.

ولو بشرتك بتعاني من الاحمرار يبقى احسن برايمر ليكي هو البرايمر الاخضر اللي بيكون داخل في مكوناته عناصر مهدئة للبشرة زي الشاي الاخضر, وفي نفس الوقت استخدمي كمية قليلة من كريم الاساس.

افضل انواع البرايمر للبشرة الحساسة: فلورمار Primer Flormar illuminating, ميك اب فورايفر Make Up For Ever Hydrating Primer.

افضل انواع البرايمر المناسب لنوع بشرتكافضل انواع البرايمر المناسب لنوع بشرتك

– ازاي تحطي البرايمر على البشرة بطريقة صح؟

1- اول حاجة تنضيف البشرة كويس اغسليها بالغسول المناسب, ومتنشفيش البشرة بشكل عنيف او قوي بس بطريقة الطبطبة وخليها رطبة شوية لان المكياج بيطلع شكله احلى على الجلد الرطب.

2- تاني خطوة حطي المرطب المناسب للبشرة ولو بشرتك دهنية ممكن تتخطي خطوة المرطب لان البرايمر هيوفرلك الترطيب اللي بشرتك محتاجاه, لكن لو بشرتك جافة او هتستخدمي برايمر من النوع اللي بيطفي لمعة البشرة بنسبة مية في المية يبقى حطي مرطب خفيف سريع الامتصاص وخالي من الزيوت, لان بعض انواع المرطبات والصن بلوك مش بتمشي مع البرايمر وممكن تسبب تقشر البشرة عشان كده لازم نتأكد من اختيار مرطب سريع الامتصاص على البشرة.

3- هنيجي دلوقتي لخطوة البرايمر خدي كمية بسيطة جدا في حجم حبة البازلاء وافرديها على بشرتك كلها من اول الجبين والانف والدقن والخدين والفكين, واستخدمي ايديك في مزجه على البشرة هتكون اسهل وهيندمج احسن من استخدام فرشة او سفنجة مكياج.

4- افردي البرايمر على البشرة لتحت في حركات دائرية خفيفة عشان توزعيه كويس بالتساوي وتملي كل مسام البشرة بطبقة رقيقة.

5- استني من 3 – 5 دقايق عشان البرايمر يتشرب ويندمج على بشرتك كويس قبل ما تحطي اي حاجة تانية.

6- دلوقتي بشرتك هتبقى مستعدة لكريم الاساس وهتلاقيه بيتفرد على البشرة بشكل اسهل واحسن بكتير, حطي كريم الاساس بتاعك بالطريقة المعتادة اللي انتي متعودة عليها, وحتى للبشرة اللي مافيهاش عيوب هتبقى مش محتاجة كريم اساس البرايمر هيكون كافي جدا لبشرتك.

7- حطي باقي المكياج بتاعك بالطريقة العادية جدا.

افضل انواع البرايمر المناسب لنوع بشرتكافضل انواع البرايمر المناسب لنوع بشرتك

– حيل مكياج باستخدام البرايمر:

هنقولكم على مجموعة حيل مكياج مفيدة جدا ممكن نستخدم فيها البرايمر.

1- لو اشتريتي كريم اساس وطلع لونه غامق عن لون بشرتك ممكن تفتحيه بانك تخلطيه بالبرايمر قبل ما تطبقيه على البشرة.

2- لو عايزة تثبتي الروج بتاعك لفترة اطول حطي على الشفايف قبل الروج طبقة خفية من البرايمر وبعدين حطي الروج الحيلة دي هتثبت الروج فترة اطول.

3- لو مش عايزة تحطي البرايمر على البشرة كلها ممكن تكتفي بانك تحطي نوع برايمر مطفي خالي من الزيوت على منطقة التي زون بس.

4- لو عندك مشكلة شعر الحواجب مش مترتب بعد ما تخلصي رسمة الحواجب وتمليها حطي عليها برايمر هيساعدك انه يخلي شعر الحواجب مترتب ومظبوط لكن استخدمي اي نوع برايمر ماعدا الـ Luminizing.

البرايمر المناسب لنوع بشرتكالبرايمر المناسب لنوع بشرتك

انواع كريم الاساس المناسبة لكل بشرة وازاي تحطيه صح

انواع كريم الاساس المناسبة لكل بشرةانواع كريم الاساس المناسبة لكل بشرة


لا تنسى تقييم الموضوع

القسم : مرأة وموضة

المصدر : ÈäÇÊ ÍæÇÁ

قد يعجبك أيضاً

اضف تعليق

فكرة الموقع : "كله لك" هو شراكة بيننا و بينكم ..دورنا : انتقاء أفضل الموضوعات المنشورة و المتداولة علي المواقع ... دوركم : تقييم المحتوي للتأكيد علي أهميته أو إرشادنا لحذفه

لمعرفة المزيد عن الموقع اضغط هنا