من وأنا صغير و لحد دلوقتي السحور في رمضان ما بيتغيرش، مهما دخلت أصناف جديدة، يفضل في أساس ثابت بيتنقل جيل ورا جيل بتفسيرات غريبة ومفردات أغرب، خلونا نتعرف عليها مع بعض عزيزي القارئ.

1- طبق الفول

Magazine delle donneطبق الفول أساسي في السحور في رمضان، فول بالزيت والليمون والكمون، في ناس بتتطلبه بالسمن، بالزبدة، المهم لازم فول على رأي سمير غانم في المتزوجون، فولاتيزم، المصري بياكل الفول طول السنة، لكن في رمضان ضرورة لأنه مسمار المعدة، حقيقي مش عارف يعني إيه وتشبيه مسمار أصله التاريخي إيه، وهل ينفع كان يبقى صامولة مش مسمار، معرفش بس هو كده. الفول مسمار المعدة، عشان تقدر تقاوم الجوع وإنت صايم.

2- البيض المسلوق

Ghadi Newsلغز تاني من ألغاز السحور، لازم بيض مسلوق، ولو سألت ليه يجيلك الرد بثقة: "عشان البيضة تسند قلبك" إزاي يا حجة، إزاي يا حج؟ هو كده، لازم بيض مسلوق، طيب ممكن بيض مقلي، بيض بالسطرمة، الإجابة إنت حر، بس لو حمي على صدرك وطبق على نفسك ما تشتكيش، فطبعاً إنت من الرعب هتسمع الكلام، عايز يعني قلبك يقف لوحده مش مسنود ببيضة مسلوقة وإنت صايم.

3- الخيار

ثقف نفسكطبق سلطة، لأ، خيار، قولاً واحداً، الخيار على السحور طقس لا يتغير، لا يجوز استبداله بأي مكون آخر، وبسؤال الأهل لماذا الخيار؟ تكون الإجابة: "عشان يطري على قلبك"! ما تحاولش تجادل يا أخ علي، في بيضة بتسند قلبك وخيارة بتطري عليه، هو القلب بيصوم لوحده في رمضان وسايب بقية الأجهزة في الجسم؟ محدش هيرد عليك.

4- الزبادي في رمضان

وصفةمحدش في مصر كلها تقريباً ما بيكلش زبادي على السحور، السحور يعني زبادي، في البيت في المطعم، مع أهلك مع أصحابك، لازم زبادي، وطبعاً لو سألت الأهل ليه الزبادي، تكون الإجابة، عشان الهضم وعشان يرطب، وقصايد غزل في كباية الزبادي وفوايدها، إللي هو من الآخر مش هتصوم لو مكلتش الزبادي، وطبعا بتاكلها وإنت ساكت.

5- كوباية الشاي وحاجة مسكرة

سحاب الخيرهي كده لازم كوباية الشاي وحاجة حلوة مسكرة، واحدة قطايف، قطعة كنافة، وبسؤال العالمين ببواطن الأمور من الأهل، ليه؟ الإجابة تكون الشاي عشان يوزن الدماغ، والحاجه الحلوة عشان ما تفرهدش وتدوخ.تحس إن السحور المصري كورس تبع كلية الهندسة، مسمار، تسند، وتوزن، ولكن هذا ما وجدنا عليه آباؤنا في طقوس السحور، وما زلنا نسير على العهد، رغم كل التحديات.كل سنة وأنتم وطيبين.