المحتوى الرئيسى

اكل صيني بالهنا والشفا جولدن دراجون مطعم صيني درجة تالتة


الزمالك كنت فاكر إني هرست كل مطاعمها حتى اللي مكتبتش عنهم رحتهم وأنا صغير، والجداد كلهم كتبت عنهم جنب القُدام برضه.
بس النهاردة جيه على بالي اكل صيني وأنا لما بحب اكل صيني بروح للمطاعم الشعبي بتاعت المعادي بحبهم، معرفش ليه؟! بحب أكلهم العفوي اللي بجد ليه طعم.
المهم النهاردة افتكرت مطعم كئيب ومهمل في فندق النيل اللي في أول محمد مظهر الزمالك.
مطعم شكله من برا بائس ومحدش بيدخله.
قرّرت هجربه مينفعش يكون في منطقتي ومكنش جربته أما حد يسألني عيب في حقي.
ويارتني جربت صنف واحد أو طبق واحد؛ دانا فتحت على الرابع.
دخلت، استقبلني راجل أربعيناتي شكله هو الكاشير والجرسون ومدير المطعم، مش لابس يوني فورم ومظهره متواضع.
المطعم ديكوره متهالك ورديء ومشغلين أغاني إنجليزي قديمة ونسختها ردئية كمان جداً! مكنتش مصدق نفسي، المهم شوفت المنيو لقيت الأسعار عالية جداً بالنسبة لأي اكل صيني شعبي، وحتى مطاعم الصيني المتوسطة.
20150111_201754_resized
طلبت شوربة Hot sour seafood soup بـ 33 جنيه! وحجمها صغير جداً، ولما جت اكتشفت إن فيها بالضبط بدون مبالغة، 12 قطعة أصغر من عقلة الأصبع، كاليماري متلج وواحدة بس جمبري بتاع الصيد الصغير جداً ده، وشوية خضار كرنب على جزر وخل كتير زاعق في الشوربة، وهوت ساور صوص ومياه!
حاجه بشعة وللأسف كنت طلبت بقية الطلبات اللي هي:
هوت ساور تشيكن. فراخ سويت آند ساور بالأناناس. سيشوان بيف. رز مقلي بالخضار والبيض. رز مقلي بالخضار بس.
20150111_203706_resized
الشوربة التانية متتخيرش عن الأولى في وحشاتها وخلها الزاعق غير المقبول.
الرز ملوش أي علاقة بالرز المقلي ومش شامم نار أصلاً بعد ما استوى، ولا فيه ريحه الخضار ولا باين البيض، والرز التاني اللي بالخضار أصلاً شايط طعمه بشع، رجّعت الاتنين جولي أوحش من الأول بس سخنين؛ التانين كانوا باردين.
أصلاً الصينيين بيعملوا الرز ده هنا في مصر بالرز المصري وبيطلع تحفة والبيض مبيبانش في زفارة والخضار بتبقى كتير والرز كدا ليه طعم، دا لا طعم ولا ريحة ولا قرمشة خضار ومخدتش منه غير زفارة البيض، اتقرفت جداً، ومكلمتوش، نزلت الفراخ السويت آند ساور؛ أوحش فراخ سويت آند ساور كلتها في حياتي، الصوص طعمه عادي مش وحش.
20150111_202507_resized
خلطة الفراخ بايشة ومقرفة، والفراخ نفسها طعمها مسلوق ومفيهاش زرة ملح ومش متبلة ومقرفة، وأنا بفتكرها دلوقتي نفسي اتقلبت وحشة حقيقي جداً بدرجة تضايق.
الأناناس والخضار متناقضين متعملوش سوى، الأناناس مستوي لدرجة إن بقا مسكر قوي ومهري، والخضار التاني عادي بيقرمش ومستواش.
وطريقة تقديم الطبق عتيقة وقديمة، ووحشة الطماطماية اللّي على جنب دي بتاعت ستات بيوت مش شيف وكمان صيني وفي المطبخ الحديث الحركات دي اتلغت، يا تحط ّحاجة من مكونات الطبق وتكون متشوحة ومستوية يا متحطش.
20150111_204050_resized
طبق اللحم المفروض أنه سابيسي، مش سبايسي أبداً، ومتقطع صغير بزيادة، والتوم والبصل كانوا محروقين مش مجرد متشوحين، كأني باكل تقلية كشري، والتوم مينفعش أصلاً يتعامل معاملة البصل المحمر، بيضيع طعمه ويبقى حاجة محروقة مزعجة، بس عامة الطبق ده كان أظرف من كل الأكل.
المطعم ده سيء جداً، أنا قليل أما بغضب كدا، واللي زاد غضبي الأسعار، دفعت 400 جنيه في الأكل ده مع الخدمة والضريبة والمياه والأكل المقرف.
20150111_203733_resized



لا تنسى تقييم الموضوع

القسم : طبخ

المصدر : كسرة

قد يعجبك أيضاً

اضف تعليق

فكرة الموقع : "كله لك" هو شراكة بيننا و بينكم ..دورنا : انتقاء أفضل الموضوعات المنشورة و المتداولة علي المواقع ... دوركم : تقييم المحتوي للتأكيد علي أهميته أو إرشادنا لحذفه

لمعرفة المزيد عن الموقع اضغط هنا